ناول
  سِّدھی-سادی گّل
  کاتراں
  خبرسار
  شخص نامہ
  نظریہ
  ادب،کلا ،سنگیت اتے سِنیما
  کاو-شار
  کِتاباں
  ڈوُنگھیاں سوچاں
  کہانی
  نصر
  ہیلتھ-لائن
  جانکاری اتے تکنالوجی










ماں بولی


Posted On :- 22-10-2016

تحریر سلیم پاشا،ٹورانٹو/ کینیڈا-

ربّ توں بعد ماں اوہ ہستی اے جس دے نال انسان دی جڑت جسمانی تے روحانی طور تے سب توں چوکھی ہوندی اے۔ ماں ای پہلا اکھر بولنا سکھاؤندی اے،خورے ایسے لئی ماں دی زبانوں نکلن والی بولی دنیا دیاں سب مٹھیاں شیواں توں سوادی لگدی اے۔لوک دانش وچ   جنم بھومی یاں دھرتی نوں ماں دے بروبر سمجھیا جاندا اے۔ایسے لئی اپنی اپنی ماں بولی نال سب نوں ماں ورگی کھچ ہوندی اے تے اوس تے انگل دھرن والے نوں لوکی اپنا سجن نہیں سمجھدے۔ کوئی بولی کیویں فاؤل ہو جاندی اے؟کیویں لوکی اپنے اصل نوں بھل کے نقل وچ گواچ جاندے نیں؟


ورہیاں پہلے اِک پنجابی فلم ”باؤ جی“ ویکھی سی۔اوہدا ہیرو اَن پڑھ ماپیاں دا پتر جنہوں پڑھاؤن لئی غریب ماپے اپنا سب کجھ داء تے لاء دیندے نیں تے جدوں اوہ انگریزی دے چار اکھر پڑھ کے باؤ بن جاندا اے،اوہ اپنے سب پرانے رشتیاں نوں وسار دیندا اے۔ کجھ ایہو جیہا کم پاکستان دے اِک مشہور انگلش میڈیم سکول دے ہتھوں وی ہوگیا اے۔جیہڑے ایس زعم وچ نیں جے اسی بیورہ کریٹ تے اعلیٰ سرکاری افسر بناؤندے ہاں۔جیویں ایہہ کوئی سکول نہ ہویا فیکٹری یا کارخانہ اے۔ خیر ساہنوں ایس گل دی کوئی پرواہ نہیں جے اوہ انگریزی زبان نوں مقدس سمجھدے نیں تے پئے سمجھن۔ اعتراض اوہدوں شروع ہوندا اے جدوں اوہ اپنی حد نوں پار کرکے ساڈی ماں بولی نوں فرنگیاں دی زبان وچ گاہل کڈدے نیں۔اُنج تے بیکن ہاؤس والے وی ایسے پنجاب دی سوہنی دھرتی دے جمے جائے نیں تے ایس سکول دے مالک مرشد بلھے شاہ ہوراں دی نگری قصورشہر دے رہن والے،ایسے لئی تے اپنے ناں دے نال قصوری وی لکھدے نیں۔میں تے ایہہ سوچدا پیاں جے بابا بلھے شاہ ہوراں نوں اپنی پنجابی بولی لئی اپنے ای شہر دے دھیاں پتر اں دے مونہوں گاہل سن کے کناں دکھ ہویا ہووے گا۔اوہ جس زبان وچ ساری عمر امرکلام لکھدے رہے،جنہوں پڑھ پڑھ کے پوری دنیا وچ علم و ادب،سوچ تے فکر دے پیاسے اپنی روحانی تریہہ بجھاء رہے نیں،اج اوہ زبان اپنے گھر وچ ای کیوں یتیم ہوگئی اے؟باؤ جی فلم وچ جدوں انگریزی پڑھیا منڈا غریب رشتہ دار دے چہرے تے تھپڑ ماردا اے تے اوس دا پیو کنبھ کے روندیاں اکھاں نال کہندا اے
” بڑی اڈیک کرائی آ  ایس چپیڑ دی  میرے باؤ پترا “

ایہہ ایلیٹ کلاس طبقہ جس دی نمائندگی اَج خورشید رضا قصوری کردے نیں،کدوں تیک اپنی ماں بولی دی نندیا کردے رہن گے؟ کدوں تیک اپنی ماں نوں آپے ای گالاں کڈھ کڈھ کے دولت دے ڈھیرجمع کردے رہن گے؟سوچدا ہاں جے اپنے بابا بلھے شاہ جی ہوراں دا سامناکس منہ نال کرن گے؟کیہ اونہاں دے مزار دے کولوں منہ نوں ولیٹ کے لنگھیا کرن گے۔ہوسکدا اے اوہ اپنا روٹ ای بدل لین جے بابا جی نال ٹاکرا ای نہ ہووے۔ ویسے وی ایہناں ایلیٹ کلاس طبقے کول لینڈ کروزر ورگیا گڈیاں نیں،جیہڑیاں شوں کرکے کولوں دی لنگھ جاندیاں نیں۔ کسے نوں کیہ پتہ جے ایس کالے رنگ دی کالے شیشیاں والی گڈی وچ کیہڑا کالے منہ والا بیٹھا ہویا اے۔ میرا اِک مشورہ اے ایس قصوری ٹبر لئی جے اپنے ناں دے نالوں قصور شہر دا مقدس اکھر مٹا کے اووہدی تھاویں نیویارک،واشنگٹن یاں لنڈن،پیرس وغیرہ لکھ لین۔جے تہانوں اپنی ماں بولی دی عزت دا پاس نہیں تے بابا بلھے شاہ ہوراں نوں وی تہاڈے ورگے کپوتراں دی اُکا لوڑ نہیں۔

تینوں ہتھیں پتراں نے ماریا
بولئے پنجاب دئیے



Leave Your Comment
  Name
  Comment
Note * - Please Enter your link in {} . Example :- {www.suhisaver.org}
  Security Code